Und suu werd des Landbierquadeddla gschbilld:

Schbillregln Quadedd glassisch
Die Kadn wern gemischd und verdaald. Der wuu linggs vom Kadngeber hoggd frochd von an Midschbieller sainer Wahl nach anner Quadeddkadn, die wuu nern fehld. Hod der Ongschbroch'ne die Kadn, mussers dem Frocher überlossn. Der Schbieler konn saine Midschbieller so lang nach Kadn frong, bis der Geengschbieler die gfodderde Quadedd-Kadn ned hod. Dernoch is der erfolglos angschbrochene Schbieler dron. Hod a Schbieler a Quadedd (vier Kadn die wuu zammghörn) zamm, leechders affn Disch. Siecher is, der wuu die massdn Quadedde zammgsammeld hod.

Drumbf-Quadedd-Regln
Die Kadn wern gmischd und vedaild. Der ersde Schbieler der wuu linggs vom Geber hoggd liest die Ongom vo aner Kadegorie vo der Schbillkadn vur, die ganz uuhm lichd (z.B. Stammgasdbiergriechla). Im Grais rum nenna die annern Schbiller dann den Werd vo ihrer obersdn Schbillkadn. Wer den besten Werd* hod, gwinnd alle Kadn, sodierd se under sain Schdobl und sochd die nächsde Kadegorie on. Wenn glai mehrere Schbieler den selbn Werd hom, dann kummds under dena zum Schdechn mid der nächsdn Schbillkadn. Der Schbieler midn besden Werd, grichd dann alle Kadn vo derer Runde. Siecher is, wer die masdn oder alle Kadn zammgraffd hod.

*Es gwinnd die heechere Onzohl der Biersordn, des äldere Braurechd, der niedrichere Bierausschdoß, die masdn Sitzplädz (wohlwaise inne oder draußn), die heechere Onzohl an Stammgasdbiergriechla, der niedrichere Bierbrais, die masdn Höhnmede, die lengsde Brodwurschd und die kerzesde Entfernung zum Franggnschdadion. Die schwazn Werde san Suuberdrümbf und vo kanner anern Kadn zu schlong. (Schdand 12/07)

Nodürlich gibds nu vill Variandn vom Schbill, die bevor mer onfengd fesdgleechd wern missn. Normolerwaise derf a Schbieler auswähln, wenner bloß nu drai Kadn hod. Vor allem baim Schdechn gibds an Hafdn Regln, z.B. dass mer die Schdech-Kadegorie midder nächsdn Kadn beibehäld oder freie Kadegoriewohl vom Schbieler der wuu dron wor oder vom Schbieler, der zuersd "Schdichd" naibläggd. Für Fanadigger in bunggdo Gemüdlichkaid schdechn viellaichd ehra wenicher als vill Sidzplädz und für die, die an Grong ned vull grieng der heechere Bierausschdoß usw.

Vill Schbas baim Schbilln und Endeggn - gschaiderwais am besdn glai vor Ord bai am zümfdichn Saidla und anner deffdichn Brodzaid!