AGGDUELLES

Zum zehnjährichn: 7. Auflooch endlich lieferbor!!!
Allmechd endlich is do. Nachdem is Quaddedla ieber a Johr ausverkaffd woar, is die 7. Auflooch endlich lieferbor. Aa vom Inhald her hodd si wos veränderd: Außer dem ganzen Daadngschmarri is aus gegebnän Onlass die Kategorie "Entfernung zum Frankenstadion umbenannd woarn in "Distanz zum Max-Morlock-Stadion". Und dann sin nu siehm neie Brauerein am Schdadd. Als do wärn die folgenden: Brauerei Wagner (Merkendorf), Mahrs-Bräu (Bamberg), Brauerei Rittmayer (Hallerndorf), Brauerei Hebendanz (Forchheim), Brauerei Ott (Oberleinleiter), Kommunbräu (Kulmbach) und Brauerei Hönig (Tiefenellern). Is Quaddedla is scho an die Verkaufsschdelln ausgelieferd und ab sofort aa widder online zu bestelln. Also Waggerla, Quadded kaafn und dann fohr mer in die Frängische uns a Bier ins Gsichd schdelln.

Flinderer-Dermine 2012
Für die, die wuus scho dodool noodwendich homm und es gor nimmer erwaddn kenna, doo schoramol die Bengatzer Flinderer-Dermine 2012 - Schdichdooch is wi imma am Oosderdiensdoch 10.4.2012:

10.04. - 16.04.2012 Gaststätte ASV-Sportheim, Stadionstraße 6
17.04. - 23.04.2012 Pizzeria „Calabria”, Neudorf, Jurastraße 5
24.04. - 30.04.2012 Gaststätte Ratsstube, Hauptstraße 43
01.05. - 07.05.2012 Gaststätte Schützenhaus, Am Zipser Berg
und Gaststätte “Zum Melcher”, Hauptstraße 70
08.05. - 14.05.2012 Gaststätte FC-Heim, Am Buchauer Berg 27
15.05. - 21.05.2012 Gaststätte Krieg, Horlach, Weinstraße 23
22.05. - 28.05.2012 Gaststätte Ponfick „Schlappenwirt”, Hauptstr. 2
29.05. - 04.06.2012 Gaststätte Glück-Auf, Loheplatz 1 und Gaststätte Zaußenmühle, Bayreuther Straße 3
05.06. - 11.06.2012 Gaststätte Zipser Berg, Lessingstraße 2
12.06. - 18.06.2012 Gaststätte Kürzdörfer, Buchau, Erlbachstraße 11
19.06. - 25.06.2012 Gaststätte Schmidt, Rosenhof, Buchauerstraße 9
25.06. - 02.07.2012 Gaststätte Steakalm, Hauptstraße 27

Jabadabduu: Dridde Auflooch Dezember 2008 endlich do!
Nachdem des lezde Landbierquadeddla scho said anner halbn Ewichkaid ausverkaffd woar hommer uns vuurgnummer, bai anner Neuauflooch a weng wos anders zu machn. So hodd des naisde Quadedd nu a Kadegorie dazugrichd (Fränggische Höhnmede) und 12 naie Braudembl: Hönich (Diifnellern), Hölzlein (Lohndorf), Schdadder (Sachsndorf), Schbeziol und Fässla (Bamberch), Hebndanz und Neder (Forchheim) Schdainbach (Erlangen), Roodnbach (Aufseß), Aichinger (Heiligenschdad), Kommunbräu (Neuhaus a.d. Bechniz) und Elch-Bräu (Duisbrunn). Des Quadedd kommer an einiche Verkaufsschdelln scho käuflich erwerm und ist ab etz glaich kommers a widder onlain beschdelln.

Maibogg 2008
Der escchde Mai rüggd näher und des hassd für an fränggischn Bierfreind blooß aans : BOGGBIER! Dadsechlich homm a haffdn fränggische Braier edzerdla an greffdichn Maibogg aff der Kaddn schdeh, um des Hormonchaos mid die Frühlingsgefühle endgüldich in Wahnsinn zu draim. Bai der Büchenbacher Brauerai Herold (Beggn Bier) und baim Enznschdaaner gibds an Maibogg alladings scho said middn im Abrül. Obber wie der Büchenbacher Hans Herold so dreffnd bemergd hodd: "Des Johr is doch alles a bißla früher!" Baim Enznschdaaner gibds sogor ZWAA Sordn Boggbier - den herkömmlichn dunggln UND an helln unfildrierdn! Zum 1. Mai-Wochenende gibds nodürlich a wahnsinns Ongebood an Bier-Agziona. Desweeng hommer selbsdverschdändlich a boar Ausflugsdibs baraad:
BOGGBIERFESD IN HOCHSCHDOOL
Vom Mi 30.4. bis So, 4.5. faierd die Brauerai Reichold im Fesdzeld des middlawaile 7. Boggbierfesd mit viel Musigg. Der Höhebunggd is am 1. Mai um 14 Uhr wenn die Braueraikönichin der Weldrekordgemainde Aufseß Julia I. den Boggbieronschdich vornimmd.
WALBERLAFEST
Vom 2.-4. Mai fliichd am Walberla, aa als Ehrnbürch bekannd, die Kuh: Es hassd dass des Walberlafesd als äldesdes Frühlingsfesd in Deitschland güld und dasses auf a aldes haidnisches Obferfesd zurügg gehd - schbäder alladings worsis Badronadsfesd vo der Hailichn Walburga, nach derer Kabbelln is Walberla aa benannd is. Dem hailichn Berch der Franggn glai bai Forchheim/Kirchehrenbach (scho in der Schdainzaid homms do ghausd) näherd mer si baim Walberlafesd dradizionell am besdn mid anner klaan Wanderung und am aldn Lied auf die Libbn (zur Melodie des Franggnlieds):

Ob Forchheim bei Kirchêrenbach
Woll’n wir zu Berge steigen,
Dort schwingt sich am Walpurgistag
Der Franken Maimarktreigen,
Der ist seit grauer Heidenzeit
Noch allem Landvolk teuer,
Schatzkind, halt Gürtel fest und Kleid,
Wir springen durch die Feuer!

Wemmers dann nauf aufn Berch gschaffd hodd schdürzd mer si nai ins Gwerch und haud si in Ranzn voll mid fedd Broodwerschd und a boor Moß gschaids Bier z.B. Hebndanz/Forcheim, Sauer/Gunzndorf, Ald/Dietzhuf u.v.m. und nuzd für die Hammfahrd am besdn des Sonderfaddn-Zusatzongebod der Bahn und vom VGN.

1. Offizielles Landbierquadedd-Dunier in Berlin!
Am Samstoch den 26.4.08 fand in der Neu-Köllner Galerie "Salon Petra" im Rommer des fränggischn Konzebdoombds "Bier und Schbiele" des 1. offizielle Quadedd-Dunier vom Landbierquadedd Fränggische Schwaiz schdadd. Im Endschbiel woarn - anders wärs ja wuhl kaum meeglich - zwaa zufällich raigschnaide Franggn aus Kulmbach und Bamberch. Bai fränggische Brozaidn hodd mer im Livedigger verfolgn kenner wie der FCN geecher Bielefeld mol widder "fasd" gwunner hodd - nur guud, dass si die fränggische Seele nach dem Clubbdrauma mid an hervorragendn Bierangebod (Gradl/Leups, Kürzdörfer/Lindenhardt, Keesmann/Bamberg) trösdn konnd.

2. Oberailsfelder Braueraifesd
Am 19. und 20. Abril 2008 finded bai Held-Bräu in Oberailsfeld des 2. Oberailsfelder Braueraifest schdadd.

Fasdnbogg bai Kaddi-Broi
Vo offizieller Saidn her werd der Heggnhuufer Fasdnbogg aigendlich ab Samsdoch den 1. Mäzz 2008 ausgschenggd. A boor ganz Gschaide homm allerdings rausgrichd, dass worschainlich scho am Fraidoch den 29. Februor das ersde Fäßla ongschdochn werd!

Taummargd beim Oddo in Schdaafeld
Ab 10.01.2008 hassds bis Oosdern widder wöchndlich am Dunnerschdooch: Dodaaler Ausnohmezuschdand beim Taummargd im Gasdhaus Hübner in Schdaafeld. Zum sysdemadischn Kamfdringgn vom subberguudn Oddo-Bier fliechd im grammeld volln Werdshaus die schbrichwerdliche Kuh. Wemmer rechdzaidich doo woor und naikummer is bevor si die Hausdüür goor nimmer aufdrüggn lässd, kommer erlehm wie alle halbe Schdund an aam Düsch die Laid schraier wie die Nerschn, wall grood anner baim Kaddnziehng a Bierfässla, an mordsdrummer Schinggn, an dodooln Riesenkandn Holzoofnbrood oder irgndan andern Unsinn gewunner hodd, worauf si dann die Durschdichn midd die die an Hunger homm zammdenna und umkeehrd und sich wemmer Glück hodd des Hausorchesder zum Bummbn der Bassduuba durch die kulduursinnichn Massn die Trebbn naufschiibd (die Kabbelln gibds jeeds Joor allerdings bloß baim erschdn und ledzdn Taummarkt). Bildnachweis: www.huebner-braeu.de

Fröhliche Bier-Waihnachd
Said a boor joor scho versuuchd mai Freind Volgmar Odde sysdemadisch Foddos vo die Chrisdbammer in die Braueraiwerdsheiser zu machn, waller irgndwann ermol an fränggisch-bierologisch-hochwissnschafdlichn "Brauerai-Chrisdbaumführer" rausbringer will. Zur Einschdimmung auf die besinnlichn Faierdooch am End vom Joor und zur Verkürzung der Waddezaid doo schoramol a glaaner Eindrugg vo saine Nochforschunga:



Obere Reihe v.l.n.r.: Brauerai Held Oberaalsfeld, Brauerai Grasser Hubbndorf, Brauerai Schwazzes Groiz Eggolshaim; middlare Reihe v.l.n.r.: Brauerai Grodl Loibs, Brauerai Aichinger Hailichnschdad, Kaddi-Broi Heggnhuuf; undere Reihe v.l.n.r.: Brauerai Schroll Nanggndorf, Brauerai Odd Underlalaader, Brauerai Heggl Wescherfeld; Bilder: Volgmar Odde

1. Dezember 2007: Allmechd etz gibds scho a zwaids Quadeddla!
Nachdem die erschde Auflooch vom "Landbierquadedd Fränggische Schwaiz" scho nach 8 Monad kombledd ausverkaffd wor, frai mer uns, die allernaisde Version bräsendiern zu kenna! Die is grood druggfrisch eindroffn und hodd zwaa sensazionelle naie Kategorien wies erzfränggischer ned sai kenna: "Länge der Brodwurschd" und "Entfernung zum Franggnschdadion". Dem vorausganga is die härdesde Reschersche vo maim ganzn Lehm! Als Vechedarier die Länge vo die Brodwerschd vo 32 fränggische Braueraigasdschdäddn rausgriing zu missn, hodd den Verfasser zwor an die Grenzn sainer Belasdborkaid gführd, hodd obber aa scho bai der Informazionsbeschaffung für äußerd lusdiche Begebenhaidn und Begegnunga gsorchd - dass die ganze Wirdshausbagaasch in wieherndes Glächder ausbrichd gherd nu zu die normoln Reaggziona! Obber wie des ferdiche Ergebnis bewaisd, simmer weder Kosdn noch Aufwand ausn Weech ganger, des Quadeddla um solchane lehrraichn Kategorien zu erwaidern, damidd die Gaudi baim Schbilln nuramal um an ganzn Zaggn gschdaicherd wern konnd. Es is nodürlich a Gschmarri zu schdraidn, ob des midd die Brodwerschd überhabdz wos aussoochd, wall die kerzern ja ofd digger usw. und mir haldn nodürlich ned in Kubf hii wenns bai die ausgmessna Durchschniddsmooße Abwaichungen gibd - obber erschdns kummdz im Lehm ja ned bloos in dem Beraich ned ausschließlich auf die Länge on, sondern bieded des ganze ja an guudn Schdoff für sinnraiche Werdshausdisggussiona bai an zumftichn Saidla Bier!

Boggbierzaid
Bei an ganzn Hafdn fränggische Brauer is masdns wenns af Wainachdn zugeehd a gräfdicher Wainachdsbogg im Auschangk - so wiisis gherd gibds den dann limidierd bis zum dradizionelln Schdärch-Oodringgn an Dreikeenich. Bai der Rossdorfer Brauerai Sauer fängd die Boggbierzaid alladings scho vil friher on: Scho saidn 18. Ogdober kumma dord die wuu affs Boggbier ganz nersch sen mid dem Schdöffla hunderdbrozentich aaf ihre Kosdn - Brädigaad: haud voll nei in di Kerm!
Nu mehra Boggbierdermine:
Brauerai Kürzdörfer, Linnehordt: ab Sa, 10.11.07
Brauerai Gruuch, Braidnlesau: ab Fr, 16.11.07
Brauerai Schroll, Nanggndorf: ab Fr, 23.11.07
Brauerai Herold, Bäichabouch: ab Fr, 14.12.07
Brauerai Grodl, Leubs: ab Mittwoch, 19.12.07

Sunndooch 21. Ogdober 2007: rund ums Walberla "Dooch der offna Brennerain"
Jedes Johr am 3. Sunndooch im Ogdober gibds rund ums Walberla den Dooch der offna Brennerain: bei insgsamd 13 Brennerain und anner Brauerai gibds an Haffdn zu endeggn und auszubrobiern! DIETZHOF: Brennerai Siebenhaar, DOBENREUTH: Brennerai Lang und Brennerai Wilhelm, KIRCHEHRENBACH: Brennerai Sponsel (Schwazer Adler), MITTELEHRENBACH: Brennerai Dahlmann-Schmidt und Obstbrennerai Oßmann, Biolandhuuf Schmidt und Brennerai Singer, ORTSPITZ: Brennerai Reichold, PRETZFELD: Edelbrennerai Haas, SCHLAIFHAUSEN: Edelbrennerai Kern, WAINGARTS: Brennerai Feesenhof und Brennerai Geist-Reich. Außerdem gibds bai der Brauerai Drummer in LEUTENBACH um Zehna, um Zwaa und ummer Viera Braueraibesichdigunga! Obber oobachd: Bai dem schdändichn Geschnäbsl gehds midder Schdandfesdichkaid aa schnell in Bach nunder - obber an richdichn Franggn hauds eh ned su schnell um!

Schbädsummer - Kerwazaid!
z.B.
vom 6.-10.9. bai Brauerai Benning-Zeissla in Hedzlsdorf
vom 29.8.-1.9. bai Brauerai Grodl in Loibs
vom 23.-27.8. bai Kaddhi-Bräu in Heggnhuuf!

Kerwa in Oberaalsfeld beim "Hollerbusch"
Ned bloos anne vo di schennsdn sondern aa, walsis scho said 1796 gibd, ane vo di eldesdn Kerwas in de fränggischn Region find vom 16.- 20. Augusd in de Oberaalsfelder Brauerei Held-Bräu schdadd. Gwaasi scho legendär is di Kerwa under anderm weecher ihrer wergli einmoolichn Höhlnbor nebern Werdshaus. Außer dass nodürlich des Bier vom Hollerbusch subber is embfilld sichs in der Höhlnbor amol an Abflschnabs auszubrobiern oder im Werdshaus sich an selbergmachdn Bierschnabs (aa mid Honich) zu genehmichn! www.held-braeu.de

Brühtroochrenna in Nanggndorf
Am Sonndooch, den 12. Augusd fand in Nanggndorf widder des sensadsionelle Brühtroochrenna schdadd: boarweis liefern sich die Dailnehmer in Zwarerdiehms dabei den ganzn Nachmidooch an underhaldsamma Baddel-Weddkambf ersd schdroomabwärts um a surer Schwimmboje rum und dann wider stromaafwerds - bei 17° Wasserdemberadur für an jeedn normoln Menschn a aanzicher Graus! Wer bei dem scheener Wedder so gschaid wor, sich ned in de Wiesnd abzukühln, der hodd si glai um di Eggn in der Brauerei Schroll nodürlich lieber a Schrollbier gnehmichd - des kühld vill besser und vor allem vo inner! www.brauerei-schroll.de

Braufest in Enzenraidd
Am Sunndooch, den 20. Mai woar bei der Brauerei Enzenschdaaner in Enzenraidd bei Schnedder wiedder a schheens Braufesdla. Bei herrlichsdn Sunnaschain und an brechnd fulln Biergaddn homms im Braukessl middn in der Werdsschduum a Schworzhoferbier (!) braud. Wie des Feier underm Braukessl dann die Werz zum Kochn brachd hodd, hodds ned blouß dem Braumasder den Schweiß nausghaud. Mer muss si allerdings nu a bissla geduldn, wall des Bier dann erschd nach anner Loocherzaid vo ungfähr 5 Wochn ausgschenggd werd. Obber freia kommer si edz scho draff!!
Waidere Dermine under www.enzensteiner.de

Landbier-Quadedd auf der Sloubier 2007
Vom 27.-29.4. hodd in Münchberch und Helmerz die Genussmesse "sloubier" schdaddgfunna. Bei am gigandischn Rohmabrogramm und an Hafdn kulinarischn Evends die alle mid Bier zammghengd homm hodds ned blouß an der Bierodeegg im Münchbercher Gödz ewich vill zum endeggn gehm. Des Landbierquadedd hodd do nodürlich unbedingd debai sai müssn!

Boggbierfesd in Hochschdohl
Am letzdn Wochenend im Abrill gehds hoch her in Hochschdohl: vom 28.4.-1.5. Boggbierfest bei der Brauerei Reichold!


Sesongbeginn bei Enzensteiner
Aa bai der Brauerei Enzensteiner in Enzenraidd bei Schnedder hod die Sesong widder ongfanga! Said 31.3. hod die Brauerei widder offn und Braumasder Maddin Kreß läd widder zur Verkösdigung mid di unglaiblichsdn Biergreazionen, wie baischbielswais des Haferbier, Emmer-Bier und dem Seelndrösder-Bogg - bassd no auf, der haud gscheid nai!

1. Februar 2007: Geburd vom Landbierquadeddla
Des Landbierquadedd Fränggische Schweiz erbliggd des Lichd der Weld. Ganz Franggn befinded sich im Quadeddrausch und schdimmd sich lehrreich ei auf die onschdehende Biergardnsesong.